Þann 28. ágúst síðastliðinn var fyrirtaka í Héraðsdómi Reykjavíkur í máli manns sem ákærður er fyrir nauðgun, kynferðisbrot gegn barni, stórfellt brot í nánu sambandi og vörslu barnaníðsefnis.

Maðurinn, sem er að nálgast þrítugt, á nokkuð langan sakaferli að baki og samkvæmt heimildum DV stríðir hann við geðræn vandamál. Í ákæru er hann sagður hafa í ótilgreindan fjölda skipta frá árinu 2020 og fram til ársins 2023 misnotað freklega yfirburðastöðu sína gagnvart stúlku sem var á aldrinum tveggja til fimm ára á þessu tímabili. Hafi hann ítrekað og á alvarlegan hátt ógnað heilsu og velferð barnsins með því að „snerta kynfæri hennar með fingrum sínum og hafa við hana önnur kynferðismök en samræði með því að setja fingur í leggöng hennar“.

Mikið barnaníðsefni

Maðurinn er auk þess sakaður um að hafa haft í fórum sínum töluvert magn af barnaníðsefni sem fannst við húsleit á heimili hans. Er þar um að ræða 330 ljósmyndir og 53 kvikmyndir sem sýna börn nakin og á kynferðislegan hátt. Fannst þetta efni á fartölvu mannsins sem lögregla haldlagði.

Einnig er hann ákærður fyrir að hafa haft á USB-lykli, sem einnig var haldlagður, eina ljósmynd og 131 kvikmynd sem sýna kynferðislega misnotkun á börnum. Ennfremur sex ljósmyndir af sama tagi, þrjár á hvorri tölvunni.

Héraðssaksóknari krefst þess að ákærði verði dæmdur til refsingar og greiðslu alls sakarkostnaðar.

Móðir stúlkunnar krefst miskabóta fyrir hennar hönd að fjárhæð fjórar milljónir króna.