„Óneit­an­lega er sér­stakt að lesa um þetta í blöðunum af því að ég hef aldrei heyrt áður að það væri ein­hver köll­un eft­ir þess­ari fjár­veit­ingu,“ segir Rósa Guðbjartsdóttir, þingkona Sjálfstæðisflokksins, í samtali við Morgunblaðið í dag.

Rósa segir að það hafi komið henni á óvart um helgina að lesa í fjölmiðlum um tveggja milljarða króna framlag ríkisstjórnarinnar vegna nýrrar viðbyggingar við Þjóðleikhúsið.

Logi Einarsson, menningar,- nýsköpunar- og háskólaráðherra, greindi frá þessu í ávarpi þegar Menningarnótt var sett á laugardag. Stefnt er að því að byggingin verði 2.000 til 3.000 fermetrar að stærð og að hún verði tekin í notkun árið 2030, eða þegar Þjóðleikhúsið fagnar 80 ára afmæli.

„Ég las um þetta fyrst á mbl.is og hafði aldrei heyrt áður að Þjóðleik­húsið þyrfti að stækka við sig. Þannig að það kom mér á óvart. Með fullri virðingu fyr­ir þeirri góðu menn­ing­ar­stofn­un þá finnst mér þetta skjóta dá­lítið skökku við á þess­um tíma,“ seg­ir Rósa í sam­tali við Morg­un­blaðið í dag.

Rósa bendir á að forsætisráðherra hafi talað um mikilvægi þess að sýna aðhald í ríkisfjármálum. Hún tekur fram að hún sé ekki á móti öflugu menningarlífi en það þurfi að forgangsraða. Veltir hún fyrir sér hvaða skilaboð sé verið að senda til landsbyggðarinnar.

„Ég veit ekki hvað fólki á lands­byggðinni finnst um að hærri veiðigjöld, sem rök­studd voru með lof­orðum um bætt­ar sam­göng­ur, séu nú, að því er virðist, notuð í Þjóðleik­húsið. Þetta eru skrít­in skila­boð til lands­byggðar­inn­ar,“ segir Rósa við Morgunblaðið í dag þar sem nánar er fjallað um málið.