Karl Garðarsson, fyrrverandi alþingismaður og fjölmiðlamaður, sem er giftur úkraínskri konu, segir að með leiðtogafundi Trump og Putin í Alaska sé búið að „normalísera“ stríðsglæpi Rússlandsforseta. Andrúmsloftið í kringum fundinn sé súrrealískt. Karl segir á Facebook-síðu sinni:

„Síðdegis í dag verður tekið á móti eftirlýstum stríðsglæpamanni með kostum og kynjum í Alaska. Birtar verða myndir af leiðtogunum tveimur þar sem þeir fagna endurfundunum, faðmast og brosa framan í heiminn. Búið er að „normalisera“ þann hrylling sem Pútin ber ábyrgð á – allt vegna valdagræðgi hans. Tvær milljónir manna sem hafa fallið og særst skipta Pútin ekki máli – í kvöld verður hann samþykktur að nýju á alþjóðasviðið. Hann verður „einn af okkur.“ Á sama tíma spóka Lavrov og aðrir rússneskir ráðherrar sig um í Alaska i bolum merktum USSR. Súrrealisminn verður ekki meiri. Myndina tók ég í minningarreit í miðborg Kyiv fyrir tveimur vikum.“