„Ég er bú­inn að tala við marga eft­ir að ég birti þessa grein og það nota marg­ir orð eins og meðal­mennska, að það sé verið að steypa alla í sama mót, að þetta verði til þess að hvati nem­enda til að bæta sig verði minni.“

Þetta segir Bjarki Már Baxter lögmaður í viðtali í Morgunblaðinu í dag en hann skrifaði athyglisverða grein í Viðskiptablað Morgunblaðsins í síðustu viku þar sem hann gagnrýndi einkunnagjöf grunnskóla. Yfirskrift greinarinnar var „B er best“ sem er vísun í orð kennara dóttur hans.

Í viðtalinu við Morgunblaðið segir hann hægara sagt en gert að fylgjast með námsárangri barna sinna eftir að tekið var upp á því að gefa einkunnir í formi bókstafa í stað tölustafa.

Hann nefnir dæmi um próf sem dóttir hans tók og fékk einkunnina B. Við skoðun á einkunnaskalanum kom í ljós að einkunnin jafngilti því að hún hefði fengið 9-15 atriði rétt á prófinu. Í gamla kerfinu hefði þessi einkunn því jafngilt einkunn á bilinu 4,5 til 7,5. „Þetta segir mér ekki neitt sem foreldri um hennar frammistöðu,“ segir hann við Morgunblaðið.

Bjarki er þeirrar skoðunar að með þessu kerfi sé erfiðara fyrir foreldra og nemendur að fylgjast með hvernig þeim gengur. Hvati nemenda til að bæta sig verði minni.

Hann bendir einnig á að Ísland sé að standa sig illa í alþjóðlegum samanburði og sama fólkið beri ábyrgð á kennslunni og hefur eftirlit með henni. „Maður upplifir þetta svolítið sem einhverja þöggun,” segir Bjarki en umfjöllunina má lesa hér.