Taílenski herinn gerði í nótt loftárásir á hernaðarskotmörk í Kambódíu í landamæradeilu sem gæti leitt til frekari stríðsátaka. Stjórnvöld í Kambódíu hafa gefið það út að árásunum verði svarað.

Loftárásirnar koma sólarhring eftir að taílenskur hermaður missti fótlegg þegar hann steig á jarðsprengju á svæði sem bæði nágrannaríkin gera kröfu til. Í kjölfarið brutust út skærur milli taílenskra og kambódískra hersveita sem kostaði að minnsta kosti einn kambódískan hermann lífið. Þá ganga ásakanir á víxl um ýmsar árásir, meðal annars gegn óbreyttum borgurum.

Þessi átök hafa aðeins ágerst eftir loftárásirnar og segja erlendir miðlar að átök hafi brotist út milli hersveita landanna á nokkrum stöðum á landamærunum sem eru alls um 817 kílómetra löng.

Hafa Taílendingar kvatt landa sína til þess að yfirgefa Kambódíu hið snarasta og leggja allar ferðaáætlanir til landsins til hliðar.

Samskipti ríkjanna hafa verið afar stirð undanfarið, sér í lagi í kjölfar hneykslismál átti sér stað í síðasta mánuði þegar taílenski forsætisráðherrann Paetongtarn Shinawatra var send í leyfi eftir að símtal lak út við kollega hennar í Kambódíu þar sem hún gagnrýndi eigin her fyrir framgöngu sína á landamærasvæðum.

Taílenski herinn er um þrisvar sinnum fjölmennari en her Kambódíu og mun betur vopnum búinn. Skýrist það meðal annars af því að Bandaríkjamenn líta á landið sem mikilvægan bandamann í heimshlutanum og hafa stutt við hernaðaruppbygginguna.