Fyrsta bráðabirgðaskýrsla um hörmulegt flugslys Air India flugs 171, sem fórst skömmu eftir flugtak frá Ahmedabad þann 12. júní, hefur vakið bæði spurningar og gagnrýni innan flugiðnaðarins. Alls létust 260 manns – 241 um borð og 19 á jörðu niðri. Einungis einn farþegi lifði slysið af.
Í skýrslunni er ýjað að því að mistök eða ásetningur þeirra sem stýrðu flugvélinni hafi valdið slysinu. Nokkrum sekúndum eftir flugtak var slökkt á rofa sem stýrir eldsneytisflæði að hreyflum vélarinnar sem gerði það að verkum að vélin missti afl. Þrátt fyrir að reynt hafi verið að endurræsa hreyflana tókst það ekki í tæka tíð.
Indverska flugmannasambandið hefur fordæmt þá umræðu sem skapast hefur um mögulegan ásetning flugmanna og kallað hana ábyrgðarlausa og særandi fyrir aðstandendur.
Sjá einnig: Telja að flugmennirnir hafi valdið flugslysinu sem kostaði 260 manns lífið – DV
Þá hafa gagnrýnendur bent á að skýrslan veki upp fleiri ósvaraðar spurningar og svör. Ekkert heildarafrit af samskiptum flugmannanna úr flugstjórnarklefanum var birt, aðeins vísað í samtalsbrot þar sem annar spyr „af hverju slökktir þú?“ og hinn svarar „ég gerði það ekki“. Ekki kemur fram hvor flugmaðurinn sagði hvað og í hvaða samhengi.
Innan geirans hafa sérfræðingar gagnrýnt skýrsluna harðlega. „Þeir segja okkur aðeins það sem þeir vilja að við vitum – hinu er haldið leyndu,“ sagði einn flugmaður. Aðrir segja skýrsluna of valkvæða og benda á að upplýsingarnar um eldri viðvörun frá FAA um hugsanlegar bilanir í slíkum eldsneytislokum séu ekki marktækar, þar sem vél þessi hafði nýlega fengið nýtt stýrimódel.
Annar þáttur í skýrslunni sem hefur valdið deilum er tilvísun í öryggistilkynningu sem bandarísk flugmálayfirvöld gáfu út árið 2018. Í tilkynningunni var flugiðnaðinum gert viðvart um tilvik þar sem áðurnefndir eldsneytisrofar hefðu verið settir í flugvélar með læsibúnaðinn óvirkan sem gerði það að verkum að möguleiki væri fyrir hendi að slökkva á rofanum fyrir slysni.
Vandamálið var ekki metið svo alvarlegt að bregðast þyrfti við því með viðgerð en hvatt en rekstraraðilar voru hvattir til þess að framkvæmda einfaldar eftirlitsskoðanir til að tryggja að læsibúnaður rofanna væri í lagi.
Í rannsóknarskýrslunni kemur fram að Air India hafi ekki framkvæmt þessar skoðanir, sem hefur orðið til þess að sumir hafa velt því upp hvort slysið geti hugsanlega hafa stafað af því að gallaður rofi hafi verið virkjaður fyrir slysni.
Endanleg skýrsla um slysið á að birtast innan árs samkvæmt alþjóðlegum reglum, en sögulega séð getur slíkt tekið mun lengri tíma. Þar til þá verða spurningarnar um hvað raunverulega gerðist í stjórnklefa flugs AI171 áfram ósvaraðar.
