Jenna Huld Eysteinsdóttir húðlæknir vill banna ljósabekki á Íslandi þar sem þeir eru stór áhættuvaldur varðandi sortuæxli, húðkrabbamein sem dregur um tíu Íslendinga árlega til dauða.

Þetta kom fram á Bylgjunni í morgun.

Jenna segir að sólbrúnka sé varnarviðbrögð húðarinnar og hún sé ekki af því góða. Sólbaðshegðun ýti undir húðkrabbamein. Hún blæs á kenningar um að sólarvörn sé skaðleg og segir þær byggja á mjög langsóttum rannsóknum. Hvað sólarvörn varðar sé ávallt hægt að treysta CE-merktum vörum.

Jenna segir að hér á Íslandi eigum við að bera á okkur sólarvörn daglega frá apríl, frá þeim tíma þegar sólin verður orkuríkari og skín inn um gluggana.

Jenna beinir síðan spjótum sínum að ljósabekkjum:

„Ef við tölum um ljósabekki þá er algjörlega fáránlegt að það sé ekki búið að banna þá,“ segir hún og bendir á að aðeins þrjú lönd í heiminum hafi bannað ljósabekki, Ástralía, Brasilía og Íran. Mjög æskilegt sé að Ísland bætist í þann hóp enda valdi ljósabekkir fleiri krabbameinstilfellum en sígarettur. „Við erum með sígarettur sem lagðir eru á miklir tollar og skattar á þær vegna þess að þær eru heilsuspillandi. Síðan erum við með ljósabekki hérna út um allt og engir skattar á þeim – Alþjóða heilbrigðisstofnunin hefur flokkar ljósabekki sem krabbameinsvaldandi efni.“

„Mér finnst að við Íslendingar ættum hreinlega að banna þetta. Við vorum ein af þeim fyrstu hérna um aldamótin að banna innan 18 ára. Það voru mörg lönd síðan sem fylgdu á eftir okkur. Það var rosalega gott því ef að þú færð í rauninni sólbruna eða brennur undir tvítugu þá ertu búinn að auka áhættuna á sortuæxlum um 75 prósent. Ef þú ert með fimm bruna undir tvítugu þá ertu búinn að auka áhættuna verulega og ef þú ert búinn að fara í ljós fyrir 35 ára aldur þá ertu búin að auka áhættuna á sortuæxlum yfir ævina um 85 prósent.“

Jenna segir að yfir 50 manns greinist árlega hér á landi með sortuæxli. „Konur greinast að meðaltali um fimmtugt og karlar um sextugt. Það eru tíu sem deyja á hverju ári úr sortuæxli. Það er ekkert grín að fá sortuæxli,“ segir Jenna.

Umræðuna í heild má hlýða á hér.