Bandaríski rithöfundurinn Michael Wolff segist hafa fengið síðustu skilaboð Jeffrey Epstein áður en hann fannst látinn í fangaklefa sínum í New York árið 2019. Þau voru í nöturlegra lagi í ljósi þess sem síðar gerðist.
Í viðtali við The Daily Beast Podcast greinir Wolff frá því að Epstein hafi sent honum skilaboð föstudagskvöldið 9. ágúst 2019, aðeins nokkrum klukkustundum áður en hann var sagður hafa svipt sig lífi aðfaranótt laugardags.
„Ég spurði hann einfaldlega hvernig honum liði, og svarið var: „Er enn að hanga’“ (e. still hanging): segir Wolff, sem telur þetta hafa verið kaldhæðin vísun í það sem var í vændum.
Epstein fannst hangandi í snöru í fangelsi Metropolitan Correctional Center í New York, og samkvæmt niðurstöðu rannsóknar dómsmálaráðuneytisins var um sjálfsvíg að ræða.
Dauði hans hefur þó vakið fjölda samsæriskenninga, meðal annars um að hann hafi verið myrtur til að koma í veg fyrir að hann upplýsti um áhrifamikla viðskiptavini sína í mansalsmálinu.
Mikil eftirvænting hefur verið eftir því að skjölin um dauða Epstein yrðu gerð opinber en því hefur Donald Trump, Bandaríkjaforseti, lengi lofað. Síðastliðinn mánudag var hins vegar tilkynnt um að ekkert yrði að því og ennfremur fullyrti bandaríska dómsmálaráðuneytið að engin haldbær sönnunargögn hafi fundist um að Epstein hafi haldið viðskiptavinaskrá.
