Ævintýraþyrst börn geta nú byrjað að leika sér í umtöluðu múmínhúsi í Ævintýraskóginum í Kjarna. Frá þessu er greint í færslu hjá Skógræktafélagi Eyjafjarðar.
Uppbyggingin hefur vakið talsvert umtal en DV greindi frá því fyrir rúmri viku að rétthafi Múmínálfanna, finnska fyrirtækið Moomin Characthers Oy Ltd, hyggðist lögsækja félagið vegna höfundarréttarbrots. Ekki hefði verið sótt um sérstakt leyfi fyrir uppbyggingunni, eins og lög gera ráð fyrir.
„Þetta er því miður blygðunarlaust höfundarréttarbrot gagnvart Moomin Characters. Lögmenn okkar eru í þessum skrifuðu orðum að undirbúa lögsókn á hendur hinum brotlegu,“ hafði blaðamaður eftir fulltrúa finnska fyrirtækisins.
En miðað við áðurnefnda færslu Skógræktafélagsins virðist ríkja bjartsýni um að farsæl lausn finnist á málinu og smáfólkið geti átt góðar stundir í Ævintýraskóginum.
„Við höfum átt í afar góðum samskiptum við Akureyrarbæ, rétthafa múmínævintýranna, fulltrúa framleiðanda múmínhússins o.s.frv. Við hlökkum til að vinna áfram að framgangi ævintýraskógarins,“ segir í færslunni.
