Lokuðum fundi Sambands evrópska sjónvarpsstöðva (EBU) í London lauk með því að ekki var kosið um áframhaldandi þátttöku Ísraels í Eurovision söngvakeppninni. Ísraelska ríkisútvarpið, KAN, lítur á fundinn sem sigur.

Nokkrar þjóðir hafa kallað eftir því að Ísrael verði vísað úr keppninni eða þá að Ísraelum verði gert að keppa undir hlutlausum fána. Meðal annars Spánverjar, Írar, Finnar, Belgar, Slóvenar og Íslendingar. Hefur EBU verið sakað um hræsni fyrir að vísa Rússum úr Eurovision en leyfa Ísraelsmönnum að keppa. Báðar þjóðir séu að stráfella saklausa borgara.

Á fundinum var vissulega tekist á um þátttöku Ísrael í Eurovision. Fulltrúi landsins, lögmaðurinn Ayala Mizrahi, sagði að þátttakan væri ekki aðeins táknræn heldur hluti af langvarandi menningarlegri þátttöku landsins.

Málamiðlun Breta

Umræðan stóð yfir í 90 mínútur og að sögn sjónvarpsstöðvarinnar Arutz Sheva gengu fulltrúar Íslands og Slóveníu harðast fram í að reyna að fá Ísrael úr keppninni. Í frétt miðilsins segir að „andúðin“ hafi verið mikil.

Fulltrúar Þýskalands, Austurríkis og Sviss hafi hins vegar barist fyrir áframhaldandi þátttöku Ísrael.

Það hafi svo verið fulltrúar Bretlands, það er BBC, sem hafi kallað eftir frekara samtali um málið og að ekki yrði kosið um það að svo stöddu. Var það samþykkt.

Eins og áður segir líta Ísraelsmenn á fundinn sem sigur, en tímabundinn þó. Hefði farið fram kosning telja þeir að hún hefði líklega endað þeim í óhag.