Í þættinum kom veiðigjaldamálið meðal annars til umræðu og gagnrýndi hún þingmenn stjórnarandstöðunnar vegna þess hvernig þeir hafa stillt málinu upp.
„Ég hef upplifað það í þinginu, svo ég segi það hreint út, það hefur verið í falsfréttastíl hvernig þetta hefur verið hjá minnihlutanum. Það er verið að hræra í pottinum til þess að skapa ótta, til þess að skapa óvissu. Það er ekki gott,“ sagði hún meðal annars.
Ummælin voru meðal annars rædd á Alþingi í gærkvöldi og í morgun skrifaði Guðrún Hafsteinsdóttir harðorða grein sem birtist á Vísi.
„Það sem við urðum vitni að í Kastljósi í gærkvöld er nýr kafli í pólitískum vinnubrögðum forsætisráðherra og hann er áhyggjuefni fyrir alla sem vilja sjá heilbrigt og virkt lýðræði. Þar var ekki bara ráðist að stjórnarandstöðunni, heldur var sú árás reist á rangfærslum, útúrsnúningum og tilraun til að stimpla lögmæt sjónarmið minnihlutans sem falsfréttir,“ segir Guðrún meðal annars.
Hún segir það vera grafalvarlegt þegar forsætisráðherra – æðsti embættismaður þjóðarinnar – vænir þá sem gagnrýnina ríkisstjórnina um að tala í falsfréttastíl.
„Slíkt tal á ekkert skylt við stjórnmál sem byggja á málefnalegri umræðu, rökum og virðingu fyrir ólíkum sjónarmiðum. Það er hins vegar bein tilraun til að þagga niður í gagnrýni og merkja andstæðinga sem óheiðarlega,“ segir hún og bætir við:
„Við verðum að segja það skýrt: Þetta er ekki bara rangt, þetta er popúlismi í sinni tærustu mynd. Að grípa til þess að gera óvini úr þeim sem spyrja nauðsynlegra spurninga, í stað þess að svara þeim. Forsætisráðherra hefur ekki getað bent á eitt atriði sem þingmenn Sjálfstæðisflokksins hafa farið rangt með í umræðum um veiðigjöld heldur hefur hún ákveðið að grípa til gífuryrða,“ segir formaður Sjálfstæðisflokksins.
Guðrún bendir á að frumvarpið um veiðigjöld hafi sætt harðri og rökstuddri gagnrýni, meðal annars frá sveitarfélögum vítt og breitt um landið. Þrátt fyrir það kjósi Kristrún að stilla sér upp sem „fórnarlambi málþófs“ eins og hún orðar það. Nefnir hún að útreikningar sýni að veiðigjöldin gætu numið yfir 70% af hagnaði fyrirtækja og 80% í heildarálagi með öðrum sköttum. Þá hafi sveitarfélög sameinast um andstöðu og varað við samfélagslegum afleiðingum.
„Þetta er ekki „falsfréttastíll“. Þetta eru staðreyndir. Og þessi staðreynd stendur einnig: Stjórnarandstaðan hefur aðeins eitt tæki til að bregðast við þegar óvandað frumvarp er keyrt í gegn á lokadögum þings – og það er að tala. Að spyrja. Að taka málefnalega umræðu. Að vanda okkur. Það er lýðræðisleg skylda okkar í þeirri stöðu sem upp er komin.“
Guðrún endar svo grein sína á þessum orðum:
„Við í Sjálfstæðisflokknum ætlum að halda áfram að tala – ekki til þess að tefja, heldur til þess að vernda. Vernda atvinnulífið, byggðirnar, fólkið í landinu. Við sjáum í gegnum orðræðu sem reynir að gera ábyrgð tortryggilega og andstöðu að skömm. Það er ekki ábyrgt að keyra slæm lög í gegn með valdboði. Það er ábyrgt að stöðva þau.“
