Á dögunum var hin 81 árs gamla Mary Cooper að fara í gegnum eigur sínar eftir að hafa flutt á nýtt heimili. Í kassa sem móðir hennar heitin átti þá fann hún gamla bók sem var forvitnileg. Um var að ræða gamla bók, frá 1911, sem fjallaði um hvernig ætti að smíða leikföng fyrir börn og datt Cooper þá í hug að gefa syni sínum hana enda er hann mikill handverksmaður.

Það var Charles Tilton, afi Cooper, einnig og en umrædd bók reyndist vera bók frá bókasafni í New Jersey sem afinn hafði fengið að láni í mars 1926 en aldrei skilað.

Cooper ákvað þá að það væri tími til kominn að skila bókinni en hafði smá áhggjur af því að hún yrði rukkuð um háa sekt. Miðað við gjaldskrá bókasafnsins í dag væri sektin fyrir 99 ára gömul vanskil um 2,5 milljónir króna.

Hana óraði þó ekki fyrir hinum hlýju viðtökunum sem hún fékk í útibúi bókasafnsins og alla athyglina sem framtak hennar fékk.

CNN fjallaði um málið en í umfjöllun fréttastofunnar lýsir Cooper því hvernig starfsmaður bókasafnsins hafi tekið við bókinni, rekið upp gól stuttu seinna þegar aldur bókarinnar kom í ljós og rokið svo til yfirmanns síns eftir að hafa beðið öldnu konuna um að hinkra.

Að endingu hópuðust um 10 starfsmenn utan um Cooper til að berja bókina augum og voru allir hugfangnir.

Bókin er nú til sýnis í bókasafninu og verður það um ókomna tíð.