Ólöf Tara Harðardóttir, þjálfari og einn stofnanda samtakanna Öfga, er látin. Ólöf var 34 ára gömul.
Samkvæmt bréfi aðstandenda Ólafar Töru lést hún á heimili sínu í Reykjavík aðfararnótt fimmtudagsins 30. janúar. Ólöf Tara var fædd í Reykjavík 9. mars 1990. Foreldrar hennar eru Tinna Arnardóttir og Hörður Örn Harðarson.
„Ólöf Tara var kraftmikil í baráttunni gegn kynbundnu ofbeldi og kom að stofnun tveggja samtaka, Öfga og Vitundar, sem börðust ötullega fyrir breytingum í þágu þolenda ofbeldis,“ segir í bréfinu. „Með Öfgum hlaut Ólöf Tara fjölmörg verðlaun fyrir vinnu sína, þar á meðal frá Mannréttindaskrifstofu Íslands, og hélt mörg erindi í tengslum við kynbundið ofbeldi. Öfgar ávörpuðu m.a. Sameinuðu þjóðirnar um kvennasáttmálann og funduðu með fulltrúum Evrópuráðsins um forvarnir og baráttu gegn ofbeldi gegn konum og heimilisofbeldi. Helstu baráttumál Ólafar Töru voru m.a. byrlanir og kvenmorð en hún lagði miklar áherslur í þeim málefnum í sinni vinnu.“
Ólöf Tara rak einnig eigið fyrirtæki þar sem hún sinnti þjálfun, sérsniðna að þörfum kvenna.
„Ólöf Tara bjó lengi við ofbeldi í nánu sambandi og mótaði það hana mikið. Hún helgaði síðustu ár lífs síns baráttu gegn ofbeldi og breyttum hugsunarhætti þjóðfélagsins í þeim efnum. En sárin rista djúpt og féll Ólöf Tara fyrir eigin hendi,“ segir í bréfi aðstandenda.
Er það einlæg ósk þeirra að breytinga megi áfram vænta og baráttan haldi áfram og skili árangri. Að dómaframkvæmd breytist og samfélagið sameinist um að ofbeldi verði ekki liðið. Þörf sé á einlægum samskiptum fólks, án upphrópana og hleypidóma. Þörf sé á umhyggju, væntumþykju og hluttekningu.
„Tökum utan um hvert annað í stað þess að taka hvert á öðru,“ segir í bréfinu.
Aðstandendur minna á að þeir sem eiga um sárt að binda og hafa sjálfsvígshugsanir hafa alltaf stuðning og von. Bent er á Píeta-samtökin í síma 552-2218 og hjálparsíma Rauða krossins, 1717.
Þeim sem vilja kynna sér nánar baráttustörf Ólafar Töru með Öfgum, er bent á Instagram.com/ofgarofgar.
