Í viðtali, sem Volodymyr Zelenskyy forseti Úkraínu veitti úkraínskri sjónvarpsstöð fyrir helgi, sagði hann að það hversu „óútreiknanlegur“ Donald Trump, verðandi forseti Bandaríkjanna, sé geti hjálpað til við að binda enda á stríðið í Úkraínu.

„Hann er mjög öflugur og óútreiknanlegur og ég get vel hugsað mér að sjá þennan ófyrirsjáanleika Trump gilda fyrir Rússland. Ég held að hann vilji gjarnan binda enda á stríðið,“ sagði Zelenskyy í viðtalinu.

Trump, sem tekur við forsetaembættinu þann 20. janúar, hefur sagt að hann vilji binda enda á stríðið í Úkraínu en það hefur staðið yfir í tæp þrjú ár. Trump hefur gengið svo langt að segja að hann muni binda enda á stríðið á „24 klukkustundum“ þegar hann tekur við völdum.

„Það verður að koma á vopnahléi samstundis og samningaviðræður eiga að hefjast,“ skrifaði Trump á Truth Social í desember.

Þessi ummæli Trump hafa vakið upp efasemdir og áhyggjur í Úkraínu. Óttast Úkraínumenn að þeir verði að láta land af hendi í staðinn fyrir frið.

Zelenskyy hefur reynt að byggja brú til Trump og verðandi stjórnar hans en hann og aðrir Úkraínumenn óttast að Trump og Repúblikanar muni skera mikið niður í hinum mikla hernaðarstuðningi sem Bandaríkin veita Úkraínu eða muni í versta falli hætta algjörlega að styðja varnarbaráttu Úkraínumanna.