Lindakirkja í Kópavogi mun efna til opinnar minningarstundar um Bryndísi Klöru Birgisdóttur sem lést síðastliðinn föstudag af völdum sára sem hún hlaut í hnífsstunguárás á menningarnótt.
Minningarstundin verður á morgun laugardaginn 7. september frá klukkan 12 til 17.
Þetta er tilkynnt á Facebook-síðu kirkjunnar og þar segir að minningarstundin verði haldin:
„Í ljósi djúprar sorgar og ákalls samfélagsins um að heiðra minningu Bryndísar.“
Bryndís fermdist í Lindakirkju vorið 2021.
Öllum sem vilja er frjálst að vera viðstödd minningarstundina en í færslunni er lýst hvernig hún fer fram:
„Á stundinni verður varpað upp myndum sem vinir og fjölskylda hafa tekið saman ásamt minningum um Bryndísi og eftirlætistónlist hennar, valin af vinkonum hennar, mun hljóma. Ekkert talað mál fer fram heldur geta allir sem vilja, komið og tendrað á kerti í minningu Bryndísar, beðið og átt hljóða stund í kirkjunni.“
Í færslunni kemur einnig fram að stofnaður hafi verið Minningarsjóður Bryndísar Klöru:
„Sjóðurinn er í umsjón KPMG og forseti Íslands, Halla Tómasdóttir, er verndari sjóðsins. Sjóðurinn mun styðja við verkefni sem miða að því að vernda börn gegn ofbeldi og efla samfélag þar sem samkennd og samvinna eru í forgrunni. Sjóðurinn mun einbeita sér að fræðslu, rannsóknum og vitundarvakningu til að koma í veg fyrir að slíkar hörmungar endurtaki sig. Framlög má leggja inn á reikning 0515-14-171717, kennitala 430924-0600.“
Færslan endar á skýrum skilaboðum:
„Heiðrum minningu Bryndísar með því að velja líf en ekki hníf. Við biðlum til allra sem bera hnífa að skila þeim til lögreglunnar. Foreldrar Bryndísar óska þess að dauði hennar verði til þess að vopnaburður heyri sögunni til og kærleikurinn verði eina vopnið.
