Úrkomusvæði fer yfir landið í dag með sunnan strekkingi vegna lægðar sem í morgunsárið var stödd fyrir vestan okkur. Í hugleiðingum veðurfræðings kemur fram að spáð sé mjög hvössum vindstrengjum á norðanverðu Snæfellsnesi og hefur verið gefin út gul viðvörun vegna þess.

Á morgun er svo önnur lægð í kortunum á svipuðum slóðum og verður sú dýpri en lægðin í dag.

„Það þýðir að vindur verður víða allhvass eða hvass (sunnan- eða suðvestanátt), jafnvel stormur í vindstrengjum á norðanverðu landinu. Einnig má búast við talsverðri rigningu fyrri part dags sunnan- og vestanlands. Seinnipartinn á morgun dregur úr vætu og rofar til í norðausturfjórðungi landsins, þar eru horfur á að hiti nái 20 stigum í hnjúkaþey. Annað kvöld dregur síðan úr vindbelgingnum,“ segir veðurfræðingur á vef Veðurstofunnar.

Gul viðvörun er sem fyrr segir í gildi á Breiðafirði í dag og er hún í gildi frá klukkan 8 til 15. Eru vegfarendur hvattir til að fara með gát og þá sérstaklega þeir sem eru á ökutækjum sem taka á sig mikinn vind.

Veðurhorfur á landinu næstu daga

Á fimmtudag:

Sunnan og síðar suðvestan 13-23 m/s, hvassast norðantil á landinu. Víða rigning fyrripart dags. Dálítil væta síðdegis, en léttir til norðaustan- og austanlands. Hiti 10 til 20 stig, hlýjast á norðaustanverðu landinu. Dregur úr vindi um kvöldið.

Á föstudag:

Suðvestan og sunnan 8-15 og lítilsháttar súld, en hægari vindur og léttskýjað austantil á landinu. Hiti 8 til 17 stig, hlýjast á Austurlandi. Fer að rigna vestanlands um kvöldið.

Á laugardag:

Suðvestan 8-15 og víða bjart, en skýjað með köflum og smáskúrir á Suður- og Vesturlandi. Hiti breytist lítið.

Á sunnudag:

Norðlæg eða breytileg átt. Rigning með köflum á norðanverðu landinu, en stöku skúrir sunnantil. Kólnandi veður.

Á mánudag:

Norðanátt og lítilsháttar skúrir eða slydduél norðaustantil á landinu, en bjartviðri sunnan- og vestanlands. Hiti 2 til 10 stig að deginum, mildast syðst.