Háskólaneminn sem réðst á Ingunni Björnsdóttur, dósent í lyfjafræði við Oslóarháskóla, með ofsafengnum hætti og stakk hana margsinnis með hníf hefur verið dæmdur í fangelsi í sjö og hálft ár. Að auki þarf hann að greiða Ingunni um 5 milljónir króna (390 þúsund norskar krónur) í miskabætur. Nemandinn þarf sömuleiðis að greiða öðrum kennara, sem einnig varð fyrir barðinu á honum, 1,5 milljónir króna (120 þúsund norskar krónur) í miskabætur.
Árásin átti sér stað þann 24. ágúst í fyrra og vakti gríðarlega athygli í Noregi enda nánast með öllu óþekkt að starfsfólk háskóla þurfi að óttast um öryggi sitt. Árásarmaðurinn veitti Ingunni minnst sextán stunguáverka, þar á meðal alvarlega stungu í kvið, og var það talið kraftaverk að hún lifði árásina af.
Árásarmaðurinn, sem var nemandi Ingunnar, var ósáttur við að hafa fallið á prófi og mætti með tvo hnífa að heiman til viðtals við Ingunni. Taldi dómari málsins að árásin hafi verið skipulögð og ekki hægt að kenna einhverskonar stundarbrjálæði um. Við réttarhöldin kom einnig fram að nemandinn sæi ekki eftir því að hafa ráðist á Ingunni með þessum hætti.
Þá kemur fram í dómnum að maðurinn sé álitinn hættulegur og því með öllu óvíst að hann geti um frjálst höfuð strokið í bráð.
Í frétt norska miðilsins VG er haft eftir lögmanni árásarmannsins að dómurinn verði nú lúslesinn og síðan tekin ákvörðun um hvort að málinu verði áfrýjað til æðra dómstigs.
