Héraðsdómur Reykjavíkur sakfelldi þann 1. febrúar mann fyrir vopnað rán á veitingastaðnum Pizzunni að Hverafold 1-3 í Reykjavík.

Maðurinn fór inn á veitingastaðinn, grímuklæddur og vopnaður hnífi, í þeim tilgangi að komast yfir fjármuni staðarins með ógnunum, eins og það er orðað í ákæru. Hann fór bak við afgreiðsluborð, opnaði kassann og tók með sér reiðufé að upphæð 18.000 krónur.

Hann ógnaði starfsfólki staðarins með hnífnum en fram kemur í ákæru að hann var kunnugur staðnum þar sem hann var fyrrverandi starfsmaður þar. Hann sagði við starfsfólkið að hann yrði að gera þetta. Fyrrverandi vinnufélagið mannsins, stúlka sem var á vakt, reyndi að ná taki á manninum en hann brást við með því að ógna henni og sveifla að henni hnífnum.

Atvikið átti sér stað í nóvember árið 2021 en brotamaðurinn var þá tvítugur að aldri. Hann játaði brot sitt skýlaust en fram kemur í dómnum að hann leitaði sér aðstoðar eftir atvikið og fór í meðferð við fíkn sinni, fyrst á Íslandi og síðan erlendis. Sagði hann fyrir dómi að hann væri í vinnu og laus við lyfin. Sagðist hann vilja axla ábyrgð á verknaðinum sem hann iðraðist mjög. Einnig kom fram að peningarnir sem hann stal komust aftur í réttar hendur.

Þetta var virt honum til refsilækkunar og einnig það að hann hefur ekki áður gerst sekur um ofbeldisfullt brot. Var hann dæmdur í sex mánaða skilorðsbundið fangelsi.