Dómur var kveðinn upp í Héraðsdómi Reykjavíkur síðastliðinn mánudag yfir manni sem var ákærður fyrir líkamsárás, nytjastuld og brot gegn barnaverndarlögum.

Rígfullorðinn maður var þar ákærður fyrir að veitast að tveimur 11 ára drengjum. Hann ýtti öðrum þeirra upp að vegg en sparkaði í reiðhjól sem var í eigu hins drengsins, stakk hjólinu inn í bíl sinn og ók á brott með það.

Atvikið átti sér stað 22. nóvember árið 2023. Fyrir dómi lýsti ákærði því að hann hafi verið að aka Borgartún og beygt suður Kringlumýrarbraut. Hefði þá snjóbolta verið kastað í framrúðuna. Hefði hann hrokkið við og næstum misst stjórn á bílnum. Hafi hann séð drengi hlaupa burt, fyllst reiði og beygt inn í ónefnda götu (nafnhreinsað úr dómi) og þá séð tvo unga stráka. Hefði hann keyrt upp að þeim og stöðvað bílinn fyrir framan þá. Hefði hann síðan farið út úr bílnum og gengið upp að þeim og öskrað að þeim, rifið í úlpu annars og sparkað að hinum. Hefði hann sagt þeim að hann vildi tala við foreldra þeirra og í reiði sinni tekið hjólið af öðrum drengnum og sett það inn í bílinn. Kvaðst hann ekki hafa ætlað að stela hjólinu heldur hefði hann viljað ná að tali af foreldrum drengjanna. Kvaðst hann eiga erfitt með að útskýra þessa hegðun sína, hann hefði „snappað“ og væri ekki stoltur af þessu.

Maðurinn kvaðst iðrast mjög framkomu sinnar við drengina en hann náði í vor sátt við við réttargæslumenn þeirra um að greiða þeim bætur og hefur hann greitt þeim bætur á grundvelli þeirrar sáttar.

Fyrir dómi játaði maðurinn háttsemina en krafðist sýknu á grundvelli þess að atvik sem lýst er í ákæru verði ekki heimfærð undir þau refsiákvæði sem þar eru tilgreind.

Dómari taldi hann sekan og sagði framkomu hans við drengina vera ruddalega. Hins vegar var tekið tillit til þess við ákvörðun refsingar að ákærði hefði sýnt iðrun og greitt brotaþolum bætur. Ákvað dómari því að fresta refsingu og fellur hún niður að tveimur árum liðnum ef ákærði heldur almennt skilorð.