Veðurstofan hefur sent frá sér tilkynningu vegna þess veðurs sem væntanlegt er að skelli á landinu í kvöld og nótt og stendur, á sumum svæðum, í um sólarhring.
Í tilkynningunni segir að djúp lægð nálgist landið með tilheyrandi leiðindaveðri um allt land næsta sólarhringinn.
Það gangi í norðaustan hvassviðri eða storm syðst á landinu frá Öræfum og vestur undir Eyjafjöll. Talsverð eða mikil rigning fylgi lægðinni á Suðausturlandi og Austfjörðum og megi búast við miklu vatnsveðri þar um slóðir næsta sólarhringinn. Einnig verði mikil úrkoma á norðanverðum Ströndum á morgun. Auknar líkur sé vatnavöxtum og skriðuföllum á þessum svæðum.
Mikilvægt sé fyrir ferða- og útivistarfólk að fylgjast vel með veðurspám og -viðvörunum.
Það lægi sunnan- og austanlands í fyrramálið, en að sama skapi gangi í norðaustan hvassviðri norðvestantil, sem geti reynst varasamt fyrir ökutæki sem taka á sig mikinn vind.
Það dragi úr úrkomu sunnan- og austanlands annað kvöld, en ekki á Ströndum fyrr enn aðra nótt.
Í Vestmannaeyjum sé mikil óvissa í veðurspánum fyrir kvöldið enda eigi mjög afmarkaður úrkomubakki að myndast nálægt eyjunni sem gæti skilað mikilli úrkomu á skömmum tíma ef svo hitti á, en líklega megi reikna með talsverðri rigningu um tíma í kvöld. Á sama tíma geti dregið úr vindi um stund, en um hálfgert svikalogn sé að ræða því von sé á austan hvassviðri í nótt sem gæti valdið fólki í tjöldum vandræðum. Það lægi síðan snemma í fyrramálið, en það verði áfram dálítil bleyta allan daginn á morgun.
