Það kostar að nota gjaldeyrisþjónustuna á Keflavíkurflugvelli. Þessu komst blaðamaðurinn og skáldið Þorvaldur Sigurbjörn Helgason að í dag á leið sinni til Ítalíu. Hann segir í samtali við Samstöðina að Íslendingar elski að láta okra á sér.

Þorvaldur gleymdi að fjárfesta í gjaldeyri áður en hann hélt upp á flugvöll. Hann ákvað því að nýta sér gjaldeyrisþjónustuna sem er í boði á flugvellinum og skipti við gjaldeyrishraðbankann Euronet sem er rekinn af fyrirtækinu Change Group.

Honum ofbauð þó þegar hann sá hvað það kostaði hann að nýta þessa þjónustu. Hann ætlaði að taka út 400 evrur og fyrir það átti að ruka hann um 65.281 kr. Þetta var 5.321 krónum dýrara en gengið sem var gefið upp hjá Landsbankanum.

„Ég ætlaði fyrst að kaupa af gjaldkera Euronet til að forvitnast um gengið en þá vildi hún rukka mig 1000 króna þjónustugjald aukalega fyrir ómakið,“ sagði Þorvaldur við Samstöðina og bætti við: „Það er eins með þessa þjónustu og aðra hér í þessu landi að við Íslendingar elskum að láta okra á okkur.“ .

Eins og DV greindi frá í apríl hafði Isavia samið við Change Group í nóvember í kjölfarið útboðs. Fyrirtækið tók við fjármálaþjónustu á Keflavíkurflugvelli í byrjun febrúar og hóf þá rekstur hraðbanka og stöðva fyrir endurgreiðslu virðisaukaskatts á flugvellinum. Töf varð þó á því að fyrirtækið byrjaði með rekstur gjaldeyrisskiptastöðva og var það vegna þess að Change Group hafði ekki öðlast tilskilin leyfi frá Seðlabanka Íslands til að reka þessa starfsemi hér á landi.