Rannsókn Lögreglunnar á Suðurlandi hefur leitt í ljós að eldsvoði sem varð í Hafnartúni við Sigtúnsgarð á Selfossi á laugardagskvöld hafi verið af völdum íkveikju. Slökkvistarf tók nokkurn tíma þar sem eldsmatur var mikill.

„Lögreglan á Suðurlandi hefur farið með rannsókn á eldsupptökum og notið við það aðstoðar tæknideildar lögreglunnar á Höfuðborgarsvæðinu og brunasérfræðings frá Húsnæðis- og Mannvirkjastofnun.

Rannsóknin hefur leitt í ljós að um íkveikju var að ræða og hefur töluverður fjöldi skýrslna verið tekin af fólki vegna málsins,“ segir í tilkynningu lögreglu.

Þar segir enn fremur að rannsókn lögreglu hafi miðað vel og lögregla hafi góða mynd af atburðum. Nokkur ungmenni hafa stöðu sakborninga í málinu og rannsóknin unnin í samráði við barnaverndaryfirvöld.