Óhætt er að segja að frétt af handtöku lögreglu á tveimur drengjum á Austurvelli í gær á mótmælum nemenda í Hagaskóla hafi vakið athygli.

Vísir greindi frá málinu í gær og sagði yfirlögregluþjónn að drengirnir, sem eru á menntaskólaaldri, hafi ekki hlýtt fyrirmælum, hindrað störf lögreglu og framið skemmdarverk. Vitni sögðu þó að enginn sérstakur aðdragandi hafi verið að handtökunni. Drengirnir voru færðir á lögreglustöð en þangað voru þeir svo sóttir af foreldrum.

Mótmælendur vilja að ríkisstjórnin bregðist við og sameini fjölskyldur frá Palestínu hér á landi og voru margir mættir á Austurvöll í gær til að sýna málstaðnum stuðning.

Illa upp aldir unglingar eða með hjartað á réttum stað?

Fjölmargir tjáðu sig á Facebook í gær og gagnrýndu margir störf lögreglu. Aðrir veltu þó fyrir sér hvað börn og ungmenni séu að gera á slíkum mótmælafundum.

„Hvað er verið að þvæla börnum í þessa mótmæla vitleysu,“ spurði einn í umræðum á Stjórnmálaspjallinu þar sem á annað hundrað athugasemdir hafa verið skrifaðar. „Þetta eru ekki börn, þetta eru illa upp aldir unglingar,“ sagði annar og enn annar bætti við: „Öllum ber að fara eftir tilmælum lögreglu.“

Aðrir töldu lögreglu hafa gengið allt of langt miðað við það sem fram hefur komið.

„Það er eins gott að þessir lögreglumenn sé ekki með skotvopn,“ sagði einn á meðan annar sagði: „Flottir krakkar með hjartað á réttum stað.“

Mjög skiptar skoðanir

Á Pírataspjallinu 2 fór líka fram fjörugar umræður. „Skömmin er hjá foreldrum barnanna. Eins skulda kennarar barnanna og skólastjórnendur viðkomandi skóla Alþingi og þjóðinni afsökunarbeiðni. Skammarlegt að ata börnum í skrílslæti!,“ sagði í einni athugasemd.

„Börnin eiga að vera í skólanum en ekki að mótmæla einhverju kjaftæði sem ég held að þau viti ekki um hvað snúist,“ sagði í annarri athugasemd.

„Fuck around & Find out. Ef þessir krakkar hefðu bara mótmælt eins og ALLIR hinir, væri þetta ekki til umræðu,“ sagði svo einn til viðbótar.

En margir voru þeirrar skoðunar að lögregla væri ekki starfi sínu vaxin.

„Þetta er ekki í lagi af svo ótal ástæðum. Myndbandið er ömurlegur vitnisburður um vangetu yfirvaldsins hérna,“ sagði einstaklingur sem tók þátt í umræðunum.

„Þetta eru hrottar. Burt með þá,“ sagði annar.

„Ekki var tekið svona á okkur í búsáhaldabyltingunni og þá var þinghúsið, stjórnarráðið og seðlabankinn veggfóðruð matvælum og málningu dag eftir dag.

„Ég tel að lögreglan hafi gengið alltof langt,“ sagði svo einn til viðbótar.

„Það er gaman að sjá yngstu kynslóðina rísa upp, segja meiningu sína og sýna börnum í stríðshrjáðu landi samúð!“