DV tekur hér saman nokkur atriði varðandi mestu vonbrigðin og mun svo á sama tíma annað kvöld birta umfjöllun um það sem fór helst fram úr væntingum þeirra.
Umræðan fer fram á undirsíðunni Visiting Iceland og hafa á annað hundrað athugasemdir verið skrifaðar á þráðinn. Óhætt er að segja að túristar nefni allskonar hluti sem ollu þeim vonbrigðum eða stóðu ekki alveg undir væntingum.
„Stærstu vonbrigðin okkar var hversu stuttur opnunartíminn var á öllu. Matvöruverslunum, bensínstöðvum og veitingastöðum til dæmis. Ég var ekki alveg að fíla heitu náttúrulaugarnar, allavega ekki miðað við verðið,“ segir einn og bætir við að hann hafi átt alveg jafn notalegar stundir í almenningssundlaugunum eins og í náttúrulaugunum.
„Þegar við komum virtist flugvöllurinn vera mjög góður en þegar við fórum var upplifunin allt önnur. Það voru alltof margir sem ferðuðust í gegnum hann,“ segir einn og heldur áfram: „Það hafa margir sagt að þeir hafi elskað matinn. Ég gerði það ekki. Ég held ég hafi ekki borðað eina máltíð sem stóð undir því sem ég borgaði fyrir hana. Nema kannski pizza í Bolungarvík.“
„Bláa lónið. Engin spurning að það er ofmetinn staður. Ég skil ekki „hæpið“ í kringum það. Mjög dýrt og mjög þéttsetið af fólki,“ segir einn í umræðunum.
„Ég vildi að það væri hraðari og skilvirkari leið til að komast frá flugvellinum og inn í borgina. Þeir þurfa að koma upp lest þarna á milli eða eitthvað,“ segir annar.
„Ég er á Íslandi núna og það sem helst hefur valdið vonbrigðum er veðrið. Ég hef verið hér í þrjá daga og skýjafarið hefur verið þannig að það er ekki möguleiki að sjá nein norðurljós. Það hefur snjóað mikið og það er ekki gott að taka góðar landslagsmyndir í snjó,“ segir einn sem segist vera frá Flórída.
„Ég verð sjaldan fyrir vonbrigðum þegar ég ferðast því ég reyni að stilla væntingum í hóf. En hafandi sagt það fannst mér flugvélarflakið á Sólheimasandi ofmetið. Bláa lónið fannst mér líka frekar ofmetið en það er gaman að hafa komið þangað,“ segir svo einn.
„Ég varð fyrir smá vonbrigðum með þjónustuna/gestrisnina sem við fengum frá Íslendingum. Ég skil að þeir séu orðnir þreyttir á ferðamönnum. Við komum í janúar og fengum illt auga oftar en við vildum.“
