Þóra Dungal lést 16. maí, 47 ára að aldri, eftir erfiða baráttu við fíknisjúkdóm, útför hennar mun fara fram í kyrrþey. Þóra lætur eftir sig tvær dætur, Max Sól Dungal og Stefaníu Guðnýju.
„Mamma mín var breysk eins og við öll. Hún hafði upplifað sinn skerf af áföllum og var lengi á flótta. Nú þarf hún ekki að flýja lengur. Við systir mín sitjum eftir og lífið er skrítið. En við höldum áfram í minningu mömmu sem reyndi að vera góð mamma þó stundum hafi sársaukinn og flóttinn bara tekið yfir,“ segir Max Sól við Heimildina.
Max er 22 ára gömul og bjó hún með móður sinni. Max þarf nú að standa á eigin fótum, auk þess að annast útför og greiða allar afborganir. Auk þess þarf hún að vinna úr áskorunum síðustu ára sem barn foreldris með fíknivanda, en einnig því mikla áfalli að versti ótti hennar hafi ræst og hún komið að móður sinni látinni og þeim missi sem hún hefur nú orðið fyrir, en nýlega missti Max einnig móðurömmu sína.
Styrktarreikningur hefur verið stofnaður fyrir Max Sól og er reikningurinn á nafni Sigrúnar Lilju Guðjónsdóttur sem hefur verið fóstra Max síðan hún var sjö ára, og er það fyrirkomulag söfnunarinnar með samþykki Max. Auk þess sem hún missti móður sína á dögunum, hafði hún nýverið misst móðurömmu sína. „Við kynntumst Max þegar við, ég og maðurinn minn, urðum stuðningsforeldrar hennar þegar hún var bara sjö ára skotta. Síðan þá hefur hún verið partur af fjölskyldunni okkar,” segir Sigrún Lilja í samtali við DV.
Reikningur: 370-22-061500
Kennitala: 191281-4899
Þóra hóf feril sem fyrirsæta 18 ára gömul og varð táknmynd X-kynslóðarinnar á Íslandi þegar hún fór með aðalhlutverk í kvikmyndinni Blossa árið 1997. Þar lék hún Stellu, sem ásamt Robba, leikinn af Páli Banine, ferðaðist um landið og lenti í ýmsum ævintýrum.
