Maðurinn sem er grunaður um að hafa skotið af byssu inni á skemmtistaðnum The Dubliner síðastliðið sunnudagskvöld hefur verið handtekinn. Þetta kom fram í tilkynningu frá lögreglu en frekari upplýsingar verða ekki veittar um málið að svo stöddu.

DV greindi fyrst frá árásinni sem átti sér stað um kvöldmatarleytið í gær. Hinn grunaði átti í samræðum við annan gest og hleypti svo af skoti inn á staðnum. Fjöldi gesta var á staðnum en árásarmaðurinn huldi andlit sitt að sögn Gríms Grímssonar, yfirlögregluþjóns  Miðlægri rannsóknardeild lögreglunnar á höfuðborgarsvæðinu. Enginn slasaðist í árásinni en byssan sem talið er að hafi verið notuð við verknaðinn fannst skammt frá.

Grunur leikur á um að árásin tengist hnífaárásinni á Bankastræti Club í fyrra sem hefur valdið miklum usla í undirheimum.