Þann 15. mars næstkomandi verður aðalmeðferð við Héraðsdóm Reykjavíkur í máli þriggja ungra manna sem ákærðir eru fyrir hrottalegt ofbeldisverk og frelsissviptingu sem þeir eru sagðir hafa framið þann 11. september árið 2019, er þeir voru á aldrinum 16-18 ára.

DV er ekki kunnugt um hvað veldur því að svo lengi hefur dregist að rétta í málinu. Fjallað var um atvikið stuttlega í fjölmiðlum á sínum tíma og í frétt Mbl.is frá 13. september árið 2019 segir:

„Fjór­ir ung­ling­ar á aldr­in­um 16-18 ára voru hand­tekn­ir í gær, grunaðir um frels­is­svipt­ingu í Heiðmörk við Elliðavatn síðdeg­is á miðviku­dag. Ung­ur maður var flutt­ur upp í Heiðmörk þar sem hann var bar­inn með kylfu og úðavopn notuð á hann. Hann var síðan lát­inn vaða út í vatnið og var orðinn kald­ur þegar viðbragðsaðilar komu á vett­vang.

Að sögn aðstoðar­yf­ir­lög­regluþjóns á höfuðborg­ar­svæðinu voru ung­ling­arn­ir yf­ir­heyrðir í gær og látn­ir lausn­ir að yf­ir­heyrsl­um lokn­um.“

DV hefur ákæru málsins undir höndum en samkvæmt henni eru þrír (ekki fjórir) menn ákærðir fyrir líkamsárás, frelsissviptingu og ólögmæta nauðung. Í ákæru segir að frelsissviptingin hafi hafist stuttu eftir að brotaþolinn settist í aftursæti bíls við Árbæjarsafn í Reykjavík, sem einn hinna ákærðu ók. Hinir tveir komu út úr farangursrými bílsins og settust í aftursætið við hlið mannsins.

Þeir hótuðu að úða piparúða í augu hans og neyddu hann þannig til að aka með sér að sumarbústað við sunnanvert Elliðavatn og vera þar. Þar eru þeir sagðir hafa veist að honum með ofbeldi, úðað piparúða í augu hans og slegið hann víðsvegar um líkamann með stálkylfu.

Þeir eru síðan sagðir hafa neytt hann til að afklæðast og fara ofan í Elliðavatn með því að hóta honum frekari líkamsmeiðingum. Að því loknu óku þeir burtu og skildu hann eftir kaldan og blautan við Elliðavatn. Maðurinn er sagður hafa hlotið af árásinni yfirborðsáverka og marbletti á báðum handleggjum, vinstri öxl, vinstri fótlegg og á baki, marbletti á andliti og höfði og yfirborðsáverka á augnsvæði.

Héraðssaksóknari krefst þess að þremenningarnir verði dæmdir til refsingar og greiðslu alls sakarkostnaðar.

Brotaþolinn kefst rúmlega 2,1 milljóna króna í miskabætur. Ennfremur krefst hann málskostnaðar frá sakborningunum.