Kærasta sakbornings í hrottalegu ofbeldismáli þar sem grunur er um kynferðisbrot, líkamsárás, frelsissviptingu og rán, þarf að sæta því að lögregla rannsaki innihald snjallsíma hennar. Landsréttur hefur nú staðfest úrskurð héraðsdóms í málinu.

Árásin átti sér stað í Kópavogi í ágústmánuði en tekin af skýrsla af stúlkunni þann 10. nóvember. Neitaði hún þá að tjá sig. Lögregla telur nauðsynlegt að afrita símann til að upplýsa málið og komast að hlut hvers og eins.

Í úrskurðinum segir að brotin sem eru til rannsóknar geti varðað allt að 16 ára fangelsi. „Með vísan til framangreinds og meðfylgjandi gagna sé afar brýnt fyrir lögreglu í þágu rannsóknar málsins að rannsaka efnisinnihald farsímans og leggja hald á sönnunargögn sem þar kunni að vera. Lögregla telji afar þýðingarmikið fyrir áframhaldandi rannsókn málsins að fengin sé heimild til umbeðinnar rannsóknaraðgerðar í samræmi við hina framlögðu kröfu og að upplýsingar sem skipt geti miklu fyrir rannsókn málsins fáist ef orðið verði við kröfunni,“ segir í úrskurðinum.

Grunur leikur á því að stúlkan hafi sótt einn hinna meintu ofbeldismanna eftir ofbeldisverkið og hefur hún neitað að tjá sig um það. Segir að tilefni sé til að rannsaka þátt stúlkunnar í brotinu. „Samkvæmt gögnum málsins hefur lögreglustjóri til rannsóknar ætluð alvarleg brot og verður að telja ríka almannahagsmuni af rannsókninni. Fallast verður á að ætla megi að með þeirri rannsóknarheimild sem lögreglustjóri krefst að veitt verði megi afla upplýsinga mikilvægra fyrir rannsókn málsins,“ segir ennfremur í úrskurðinum.

Úrskurði Landsréttar og héraðsdóms í málinu má lesa hér.