Eins og fram kom í fréttum í gær þá er land farið að rísa á nýjan leik við Svartsengi og er það 5,5 sinnum hraðara landris en fyrir skjálftahrinuna miklu þann 10. nóvember. Þá flæðir kvika þar inn í tíu sinnum meira magni en í aðdraganda skjálftanna.

Þorvaldur Þórðarson, prófessor í eldfjalla- og bergfræði, sagði í samtali við Morgunblaðið að nú streymi um 50 rúmmetrar af kviku inn í geymsluhólfið undir svæðinu á sekúndu hverri en fyrir skjálftahrinuna miklu var það 5 til rúmmetrar á sekúndu.

Kvikuhólfið er á um 4,5 km dýpi og innflæði í það veldur því að land rís en það seig þegar kvikan hljóp austur undir Sundhnúkagíga.

Þorvaldur sagði að ef mál þróast áfram á þennan veg muni landið í Svartsengi hafa náð fyrri stöðu eftir 5 til 15 daga. Erfitt sé að segja til um hvort þá gjósi því kvikan geti einnig hlaupið eins og gerðist 10. nóvember, eða þá að eitthvað allt annað gerist.

Hann sagðist telja vaxandi líkur á eldgosi á norðanverðri Sundhnúkagígaröðinni og nauðsynlegt sé að hugað sé að fyrirbyggjandi aðgerðum vegna hins nýja veruleika sem nýtt eldgosatímabil sé.