En á að nota þessa peninga í kjarnorkuvopn sem er beint að evrópskum stórborgum? Á að nota þá til að kalla varalið hersins út? Á að nota þá til að auka og hraða framleiðslu á flugskeytum og fallbyssuskotum?
Enn er bara um tölur á blaði að ræða en aukning útgjalda til hersins bendir til að Rússar séu að undirbúa sig fyrir harðar og langvarandi deilur við Vesturlönd.
Útgjöld til hersins hafa verið miklu meiri á þessu ári en ráð var fyrir gert í fjárlögum. Á fyrri helmingi ársins rann meira fé til hersins en reiknað var með að hann fengi allt árið að sögn Reuters.
Samkvæmt fjárlögum ársins áttu um 17% af heildarútgjöldum ríkisins að renna til hersins en í raun hafa um 37% af heildarútgjöldunum runnið til hersins. Á næsta ári gæti hlutfallið orðið enn hærra.
Þessi auknu útgjöld til hersins eru hluti af alþjóðlegum taktískum breytingum sem Rússar hafa staðið í síðustu árin en þessar breytingar fóru á mikið flug í kjölfar innrásarinnar í Úkraínu í febrúar á síðasta ári.
Í nýrri utanríkisstefnu Rússa, sem var gefin út í mars á þessu ári, kemur fram að óhjákvæmilegt sé að til vopnaðra átaka komi.
Áður fyrr voru það aðeins þjóðernissinnaðir dómsdagsspámenn sem ræddu hugmyndir um að Rússar myndu beita kjarnorkuvopnum sínum til „takmarkaðra“ árása á Evrópu. Nú hafa þessar hugmyndir verið teknar upp af ráðgjöfum ráðamanna í Kreml sem eru talsmenn þess að kjarnorkuvopnum verði beitt í Evrópu ef fælingaraðferðir Rússa reynast ekki nægja.
En skýrar vísbendingar eru nú uppi um að Rússar ætli að grípa til umfangsmikillar herkvaðningar á næstunni. Í júlí samþykkti þingið að herskyldualdurinn verði nú fyrir 18 til 30 ára. Í tengslum við þessa ákvörðun sagði formaður varnarmálanefndar þingsins að þetta væri bara fyrsta skrefið í því að auka úrræði hersins til að standa í langvarandi stríði.
„Þetta er gert með stórstríð í huga, með almenna herkvaðningu í huga,“ sagði formaðurinn.
Þessi mikla útgjaldaaukning til hersins og að Rússar ætla að dæla út nýjum hermönnum setur langtíma þrýsting á Úkraínu og vestræn bandalagsríki landsins. „Ég verð að vera undir langt stríð búinn,“ sagði Volodymyr Zelenskyy, forseti Úkraínu, nýlega í samtali við The Economist.
