Tæplega 300 rússneskir stjórnarandstæðingar, sem eru í útlegð, komu saman í síðustu viku í húsnæði Evrópuþingsins og ræddu þetta.
Það voru fjórir þingmenn á Evrópuþinginu sem boðuðu til fundarins sem var sá fyrsti þar sem Evrópuþingið hefur gefið rússnesku útlögunum opinberan vettvang til að funda. Ástæðan er að í Evrópu eru sumir farnir að hugleiða hvernig Rússland mun líta út þegar Pútín verður horfinn af sjónarsviðinu.
„Þetta er í fyrsta sinn sem talað er um möguleikann á stöðunni eftir Pútín. Fyrir þremur mánuðum var þetta útilokað. ESB-ríkin töldu að Pútín myndi verða forseti árum saman ef ekki áratugum saman . . . Núna, hefur þessi skoðun breyst,“ sagði Bernard Guetta, franskur þingmaður sem var meðal fundarboðenda. The Guardian skýrir frá þessu.
Mikhail Khodorkovsky, sem var áður ríkasti maður Rússlands en missti allt þegar hann var fangelsaður 2003, sagði að það að skipta Pútín út muni ekki breyta neinu ef kerfið verður áfram óbreytt. „Það verður að eyða þessari stjórn. Það er engin önnur leið til friðsamrar, eðlilegrar framtíðar fyrir Rússland og Evrópu og allan heiminn,“ sagði hann á fundinum.
Rússneskir stjórnarandstæðingar hafa haft þetta sama sjónarhorn á lofti árum saman en oft hefur fólki kannski fundist þetta vera einhverskonar óskhyggja frekar en raunsæi. En nú, þegar rússneski herinn á í vök að verjast, árásir eru gerðar með drónum í Rússlandi og af rússneskum andspyrnuhópum og deilur innan elítunnar eru farnar að verða lýðnum ljósar, eru margir farnir að velta fyrir sér hvort Pútín sé eins öruggur í Kreml eins og áður var talið.
