Landsréttur hefur staðfest gæsluvarðhaldsúrskurð héraðsdóms yfir manni sem er til til rannsóknar hjá lögreglu vegna gruns um alvarlegt heimilisofbeldi.

Málsatvik eru þau að um hálfsjöleytið að morgni 25. febrúar barst lögreglu tilkynning um heimilisofbeldi í Keflavík. Maðurinn sem hér á í hlut hafði þá hringt og sagst hafa slegist við eiginkonu sína. Hún hefði síðan hlaupið nakin út og sagðist hann óttast um hana. Lögregla fann konuna skömmu síðar á Heilbrigðisstofnun Suðurnesja (HSS).  Sakaði hún manninn um ítrekað andlegt, líkamlegt og kynferðislegt ofbeldi. Eftir skoðun á HSS var konan flutt á Landspítalann í Reykjavík þar sem hún gekkst undir aðgerð vegna alvarlegra og lífshættulegra innvortis áverka. Var framvæmd á henni bráðaaðgerð. Segir að áverkarnir hafi aðeins geta komið til við kynferðisofbeldi ásamt alvarlegri líkamsárás.

Hinn grunaði hefur setið í gæsluvarðhaldi vegna málsins síðan 25. febrúar. Er hann sakaður um að hafa misþyrmt og svívirt konuna margsinnis á heimili þeirra. Ber hún mikla áverka eftir ofbeldið. Í rökstuðningi héraðssaksóknara fyrir gæsluvarðhaldi segir meðal annars að í dómaframkvæmd hafi verið lagt til grundvallar að ríkir almannahagsmunir standi til þess að menn sem eru sterklega grunaðir um alvarleg ofbeldisbrot gangi ekki lausir.

Það er niðurstaða bæði héraðsdóms og Landsréttar að maðurinn skuli sitja í gæsluvarðhaldi til 15. júní næstkomandi.

Úrskurðina má lesa hér.