Boris Bjarni Akbachev, sem markaði djúp spor í handboltasögu Íslands, er látinn 89 ára að aldri.
Boris kom fyrst til Íslands frá Sovétríkjunum árið 1980 til þess að þjálfa Valsmenn í tvö ár og gaf strax þá ungum og efnilegum leikmönnum eins og Valdimar Grímssyni, Jakobi Sigurðssyni, Júlíus Jónassyni og Geir Sveinssyni tækifæri.
Sjö árum síðar, árið 1989, kom Boris aftur til Íslands til að þjálfa og settist hér að í kjölfarið. Hann þjálfaði Val en var einnig aðstoðarmaður Þorbjörns Jenssonar með íslenska landsliðið en undir þeirra stjórn náði íslenska landsliðið 5. sæti á HM í Kumamoto í Japan. Hjá Val kom hann meðal annars að þjálfun Dags Sigurðssonar og Ólafs Stefánssonar sem eins og fleiri íslenskir handboltamenn hafa lýst því hversu gríðarlega mikil áhrif Boris Bjarni hafði þá þróun þeirra, bæði innan og utan vallar.
Boris fékk íslenskan ríkisborgararétt árið 1997 og tók þá upp nafnið Bjarni. Boris Bjarni var sæmdur gullmerki Vals og silfurmerki Handknattleikssambands Íslands fyrir framlag sitt til handbolta hér á landi. Hann lætur eftir sig eiginkonu og tvö uppkomin börn.
