Þann 14. september síðastliðinn var íslenskur karlmaður á þrítugsaldri dæmdur í fjögurra mánaða fangelsi fyrir kókaínsmygl. Maðurinn sem um ræðir flutti inn 127,89 grömm af kókaíni með 80% styrkleika en en kókaínið var ætlað til söludreifingar hér á landi í ágóðaskyni. Hann smyglaði kókaíninu í 10 pakkningum innvortis til landsins frá Brussel, Belgíu.

Ekkert hefur komið fram sem bendir til þess að ákærði hafi verið eigandi kókaínsins eða að hann hafi tekið þátt í skipulagningu á kaupum og innflutningi þess til landsins, það er að segja fyrir utan það að hann samþykkti að flytja þau til Íslands gegn greiðslu.

Fyrir dómi játaði maðurinn afdráttarlaust sök samkvæmt ákæru. Dómarinn sá ekki ástæðu til að draga það í efa að játningin væri sannleikanum samkvæm þar sem hún var í samræmi við sönnunargögn málsins.

Ökuníðingur sem reglulega er dæmdur í fangelsi

Þetta var ekki í fyrsta skipti sem maðurinn kemst í kast við lögin. Í dóminum er farið yfir fyrri brot mannsins en frá árinu 2016 hefur hann hlotið sjö refsidóma og sex sinnum gengist undir sátt fyrir umferðarlagabrot. Í desember árið 2016 fékk maðurinn sekt fyrir fíkniefnaakstur og fíkniefnalagabrot. Árið eftir gekkst hann fimm sinnum undir sektargreiðslur auk þess sem hann var sviptur ökurétti fyrir umferðarlagabrot, aðallega fyrir akstur undir áhrifum áfengis og fíkniefna. Þá ók hann einnig þrátt fyrir að vera ekki með ökuréttindi.

Í febrúar árið 2018 var hann svo dæmdur í 60 daga fangelsi og sviptur ökurétti ævilangt fyrir fíkniefnaakstur og að aka þrátt fyrir að vera sviptur ökurétti. Í desember á sama ári var hann dæmdur í 90 daga fangelsi og sviptur ökurétti ævilangt fyrir sömu brot. Í febrúar árið 2019 var hann dæmdur í sex mánaða fangelsi fyrir fíkniefnaakstur og fleiri umferðarlagabrot. Í apríl árið 2019 var hann dæmdur í 15 daga fangelsi fyrir akstur sviptur ökurétti og í septemer á sama ári fékk hann aftur dóm fyrir akstur sviptur ökurétti, í þetta skiptið 60 daga fangelsi.

Um haustið árið 2020 var maðurinn dæmdur í níu mánaða fangelsi fyrir ölvunarakstur og fleiri umferðarlagabrot. Mánuði síðar var hann svo dæmdur í fjögurra mánaða fangelsi fyrir akstur sviptur ökurétti en um var að ræða hegningarauka.