Úkraínska sendiráðið í Líbanon sagði í gær að ekki sé vitað hvar flutningaskipið Razoni er statt. Þetta er fyrsta skipið sem sigldi með korn frá Úkraínu eftir innrás Rússa. Um borð eru 26.000 tonn af maís sem á að nota í hænsnafóður.

Farmurinn átti að fara til Líbanon en kaupandinn þar vildi ekki taka við farminum því hann kom miklu seinna en um var samið í upphafi. Búið er að selja og kaupa farminn nokkrum sinnum síðan.

Slökkt hefur verið á staðsetningarbúnaði skipsins síðustu daga. Síðast er vitað um það undan strönd Kýpur.

Razoni sigldi úr höfn í Odesa þann 1.ágúst en skipið er skráð í Sierra Leone.

Það lagðist að bryggju í Mersin í Tyrklandi 11. ágúst. Reuters segir að þegar það lét úr höfn þar hafi verið slökkt á staðsetningarbúnaði þess. Hafði Reuters eftir heimildarmönnum í flutningageiranum að skipið sé á leið til Tartous í Sýrlandi.