Dómur hefur fallið í máli manns í Héraðsdómi Suðurlands en maðurinn var staðinn að ítrekuðum bensínstuldi.
Í samtals 207 skipti stal hann allt í allt 19.255,30 lítrum af eldsneyti, að andvirði 3.625.941 króna. Þetta gerði hann á tíu mánaða skeiði árið 2020 á sjálfstafgreiðslustöðvum N1 í Þorlákshöfn, Sandgerði, Garði, Laugarvatni og Flúðum. Maðurinn gerði þetta í auðgunarskyni og notaði viðskiptakort fyrirtækisins til að láta skuldfæra þessar upphæðir á reikning þess.
Málið var tekið fyrir dóm fimmtudaginn 16. júní síðastliðinn. Brotaþolinn, Suðurverk efh, gerði kröfu um að ákærði yrði dæmdur til að greiða skaðabætur að fullu andvirði stolna eldsneytisins. Maðurinn viðurkenndi sekt sína, sagðist iðrast gjörða sinna og einnig að hann hefði náð samkomulagi við brotaþola um greiðslu skaðabótanna.
Þá var þess einnig krafist að ákærði greiði málskostnað brotaþola, 120.000 krónur.
Maðurinn var dæmdur í 90 daga skilorðsbundið fangelsi og fallist var á allar skaðabótakröfur brotaþola.
Dóminn má lesa í heild sinni hér.
