Þetta er í raun samningur um öryggismál Finnlands og Svíþjóðar þar til ríkin fá inngöngu í NATÓ en reiknað er með að þau sæki um aðild að NATÓ innan skamms. Finnski forsætisráðherrann, Sanna Marin, og Sauli Niinisto, sendu frá sér sameiginlega yfirlýsingu í morgun þar sem segir að þau telji rétt að Finnar sæki um aðild að NATÓ.
Við undirritun samningsins í Helsinki í gær sagði Johnson að sú aðstoð sem Úkraínu er veitt og samningurinn við Finna og Svía sé lykillinn að því að takast á við Vladímír Pútín Rússlandsforseta. Þegar hann var spurður hvort það sé rökrétt að styðja Úkraínu á sama tíma og Bretar glíma við síhækkandi framfærslukostnað sagði Johnson: „Auðvitað, meiri stuðningur verður veittur á næstu mánuðum“. Hann bætti síðan við að það væru stór mistök að halda að svarið við efnahagsmálum sé að láta Pútín komast upp með villimannslega hegðun sína í Úkraínu.
Það eru mikil tíðindi að Finnar og Svíar virðast ætla að sækja um aðild að NATÓ en bæði löndin hafa haldið fast í hlutleysisstefnu sína frá lokum síðari heimsstyrjaldarinnar. En með innrás Rússa í Úkraínu má segja að þeim hafi tekist að ýta Finnum og Svíum í faðm NATÓ. Aðild að NATÓ nýtur mikils stuðnings meðal almennings í báðum löndum og er það algjör viðhorfsbreyting frá því sem var fyrir innrásina.
Sauli Niinisto, Finnlandsforseti, sagði að það væri Rússum sjálfum að kenna að Finnar og Svíar íhugi aðild að NATÓ. Rússar séu orðnir mun árásargjarnari og hafi sýnt að þeir „séu reiðubúnir til að ráðast á nágrannaríki“.
Johnson sagði að innrás Rússa í Úkraínu hafi „opnað nýjan kafla“ í „eftir kalda stríðs sögunni“. Innrásin hafi breytt stöðu öryggismála í Evrópu og endurskrifað raunveruleikann og endurmótað framtíðina.
