Maðurinn sem lést í Ólafsfirði á aðfaranótt mánudags hét Tómas Waagfjörð og var fæddur árið 1976. Maðurinn lést af sárum sínum eftir stungu með eggvopni. Þrjár manneskjur eru í gæsluvarðhaldi vegna rannsóknar málsins, tvær konur og einn karlmaður.
Móðir Tómasar býr á Spáni og náði DV sambandi við eiginmann hennar. Aðspurður sagði hann að lögregla hefði lítið geta upplýst þau um rannsókn málsins en lögreglumaður hafði samband við þau hjónin í gær og tilkynnti þeim um atvikið. „Þau máttu ekki segja neitt að svo stöddu,“ segir maðurinn.
„Við förum til Íslands á föstudaginn,“ segir maðurinn en framundan er að hitta nána ættingja Tómasar og ræða málin. Eins og nærri má um geta eru ættingjar Tómasar harmi slegnir yfir hinum hræðilega atburði og segir maðurinn afar mikilvægt að komast til Íslands næstu daga, hitta fólkið og stilla samans strengina.
Flestir ættingjar Tómasar búa í Reykjavík en föðurfólk hans bjó um tíma í Garðabæ. „Maður er svolítið langt frá,“ segir maðurinn. Staðfesti hann að Tómas hafi verið ættaður úr Reykjavík en búið stóran hluta ævinnar í Ólafsfirði.
Að sögn mannsins liggur ekki fyrir hvar og hvenær útför Tómasar verður haldin en þau mál verða rædd á væntanlegum fjölskyldufundi um næstu helgi.
