Velta fyrirtækisins á síðasta ári var 4.250 milljónir og hagnaðurinn var 1.954 milljónir. Feðginin sem eiga Lyru ákváðu að greiða sér 750 milljónir í arð. Fréttablaðið skýrir frá þessu í dag.
Lyra er fjölskyldufyrirtæki sem var stofnað 1991. Það fæst við sölu á rannsókna- og efnagreiningatækjum og rekstrarvörum til efnagreininga. Höskuldur H. Höskuldsson er framkvæmdastjóri og aðaleigandi.
Landspítalinn er stærsti viðskiptavinur fyrirtækisins. Samkvæmt upplýsingum frá spítalanum var ekki efnt til útboðs áður en vörur voru keyptar af Lyru. Undanþágur fengust til að sleppa útboðum vegna ástandsins af völdum heimsfaraldursins.
Spítalinn keypti meðal annars raðgreiningatæki en einnig hvarfefni til greininga á sýnum vegna kórónuveirunnar. Í svörum spítalans til Fréttablaðsins kemur fram að nauðsynlegt hafi þótt að fá þessi tæki og efni því greiningargetan hafi verið sprungin.
Velta Lyru 2016 var 596 milljónir og hagnaðurinn 8 milljónir eftir skatt. En í fyrra var hagnaðurinn 1.954 milljónir eða tæpur helmingur þess sem selt var fyrir.
Nánar er hægt að lesa um málið í Fréttablaðinu í dag.
