Play hefur kynnt nýjan áfangastað en það er Gran Canaria. Eyjan er ein af Kanaríeyjum sem tilheyra Spáni en eru við norðvesturströnd Afríku.

Á syðsta hluta eyjunnar eru einhverjir vinsælustu sumardvalarstaðir Evrópubúa, á norðurströndinni er að finna höfuðborgina Las Palmas en miðja eyjarinnar er skógi vaxið fjalllendi. Hitastigið er í kringum 20°C, andvarinn frá sjónum kælir hitann frá sólinni og meðfram allri eyjunni eru unaðslegar strendur og tær sjór.

Gran Canaria býður upp á fjölbreytta möguleika með dásamlega golfvelli, frábærar aðstæður til hjólreiða, dýragarða, vatnagarða og söfn og útsýnið og stemningin í sjarmerandi fjallaþorpunum er einstök upplifun.

Fyrsta flug Play til Gran Canaria verður 22. desember og flogið verður einu sinni í viku á miðvikudögum til 13. apríl 2022. Áfram verður flogið til Tenerife en það er ágætt að hafa úrval af Kanaríeyjum þegar kemur að sólþyrstum Íslendingum.

Á morgun, 24. júní fer svo fyrsta flug Play í loftið til London Stansted. „Þetta er áfangi sem starfsmenn Play hafa lengi beðið eftir og mikil vinna, elja og þrautseigja að baki því að komast loksins í loftið,“ segir Birgir Jónsson, forstjóri Play.