Jóhannes Tryggvi Sveinbjörnsson, gjarnan kallaður Stjörnunuddarinn, hefur opnað nýja meðferðastöð fyrir karlmenn undir nafninu „Útlaginn.“ Jóhannes var í janúar dæmdur í fimm ára fangelsi í Héraðsdómi Reykjaness fyrir fjórar nauðganir sem hann framdi á nuddbekk Jóhannesar á meðferðarstofunni Postura. Vefslóð á Útlagann er áfram postura.is. Meðferðin sem Jóhannes veitti áður, fór meðal annars fram í gegnum leggöng og endaþarm kvenna sem til hans leituðu.

Á fimmta tug kvenna gáfu sig fram á árunum 2017 og 2018. Rúmlega 20 konur kærðu Jóhannes fyrir nauðgun en að endingu voru fjögur mál tekin til ákærumeðferðar hjá Héraðssaksóknara. Jóhannes var sakfelldur í öllum tilfellunum. Málinu hefur verið áfrýjað til Landsréttar.

Á vefsíðu Útlagans kemur fram að þjónustan sé fyrir karlmenn með stoðkerfisvanda. „Við sérhæfum okkur í að leysa verki, krónísk vandamál, liðverki og skekkjur,“ segir á Postura.is.

Í samtali við DV segir eitt fórnarlamba Jóhannesar vera orðlaus yfir stöðunni. „Þetta eru skýr skilaboð til okkar – bara éttu skít og drullu.“

Þetta er siðleysi í hámarki og sýnir hversu mikil vanvirðingin er í garð fórnalamba hans og hversu sama honum er um skaðann sem hann hefur valdið. Kannsi sýnir þetta best hversu mikið skítsama honum er um dómstóla landsins. Hvernig í ósköpunum er kerfið svona brenglað að ekki er hægt að stoppa raðnauðgara þegar hann er að leggja upp í næstu gildru? Hvað segir heilbrigðiseftirlitið? Landslæknir?

„Jesús, ég er bara orðlaus,“ segir konan loks.