Ekið var á hjólreiðamann í Geirsgötu í miðborg Reykjavíkur í gærkvöldi. Hann kvartaði undan eymslum í baki og var fluttur á Bráðadeild.

Í Breiðholti var tilkynnt um sölu fíkniefna úr bifreið. Tveir menn voru handteknir er þeir voru að ganga frá bifreiðinni. Við leit í henni fundust ætluð fíkniefni í söluumbúðum.

Á athafnasvæði Fisfélagsins við Hólmsheiðarveg neyddist flugmaður fisvélar til að nauðlenda í gærkvöldi. Þegar vélin var komin í 300 feta hæð stöðvaðist mótor hennar og tókst flugmanninum ekki að endurræsa hann og neyddist því til að nauðlenda. Í lendingunni lenti vélin á steyptum kanti, valt og endaði á hvolfi. Flugmaðurinn kvartaði undan verk í fæti en farþega sakaði ekki.

Lögreglan hafði afskipti af ökumanni sem var sagður hafa ekið inn á Grafarholtsvelli.

Þrír ökumenn voru handteknir grunaðir um að vera undir áhrifum áfengis og/eða fíkniefna.