Síðan eldgosið í Geldingadölum hófst þann 19. mars síðastliðinn hefur margt vatn runnið til sjávar, eða öllu heldur mikið af hrauni runnið um dalinn. Fleiri gígar hafa opnast og hraunið hefur gjörbreytt landslaginu á svæðinu til eilífðar.

Þeir sem fóru að eldgosinu þegar það var tiltölulega nýhafið komu að allt öðru svæði en þeir sem ganga þangað þessa dagana. Sumir hafa þó farið oftar en einu sinni að gosstöðvunum og er Héðinn Þorkelson, framkvæmdastjóri og stofnandi Diving Iceland, einn þeirra. Héðinn fór fyrst að eldgosinu þriðjudaginn 23. mars en hann fór svo aftur þangað í gær. Miklar breytingar hafa orðið á svæðinu á þessum stutta tíma.

Héðinn birti tvær myndir á Facebook-síðu sinni í dag þar sem hann situr á nákvæmlega sama staðnum við eldgosið en landslagið og bakgrunnurinn á myndunum er allt annar. Til gamans má geta að mismunandi félagar voru með í för í ferðunum. „Finnið 5 villur!“ sagði Héðinn í færslunni á Facebook. „Það er gaman að þessu,“ segir Héðinn svo um myndirnar í samtali við DV.

„Er þetta tekið á sama stað?“ spurði einn vinur Héðins í athugasemdunum við myndirnar og Héðinn bendir þá á að þetta er hvorki meira né minna en nákvæmlega sami staðurinn. „Sérð það á steinunum,“ segir hann en steinarnir á myndunum eru þeir sömu en gróðurinn í kringum þá er horfinn á seinni myndinni.

Þessar mögnuðu myndir sem Héðinn deildi má sjá hér fyrir neðan: