Gífurleg aukning hefur verið undanfarna mánuði á tilvísunum til átröskunarteymis BUGL. Það er í fyrsta skipti biðlisti eftir að komast í meðferð hjá átröskunarteymi BUGL frá stofnun teymisins árið 2000. „Það er búin að vera 60 prósenta aukning í tilvísunum til okkar frá því í september 2020,“ segir Tinna Guðjónsdóttir, hjúkrunarfræðingur og teymisstjóri átröskunar Barna- og unglingageðdeildar Landspítala. Greint er frá þessu í nýjasta tölublaði DV.
Það er margt sem gæti spilað inn í þessa gríðarlegu aukningu. „Það hefur verið breytt samfélag í COVID. Við hjá teyminu hugsum það þannig að það hefur verið titringur í rútínu barnanna, foreldrarnir eru meira heima og sjá mynstrið, börnin eiga erfiðara með að fela það. Ég vil ekki henda neinu fram þar sem við erum ekki viss. Mögulega COVID-árið góða. Svo getur það verið að heilbrigðisstarfsfólk sé meðvitaðra um áhættuna. En þetta er mikil aukning og sérstaklega hjá ungum krökkum. Þetta eru alveg ótrúlega alvarleg veikindi og það má ekki myndast biðlisti því börnin veikjast bara á meðan þau bíða, ástandið verður bara verra ef þau fá ekki strax hjálp.“
Tinna segir að það vanti fleira starfsfólk og það þurfi að auka fjárframlög ríkisins til BUGL og átröskunarteymisins. Meðferðin er flókin og þarfnast þéttrar þjónustu til að byrja með.
Börnin sem greinast verða sífellt fleiri og yngri. Undanfarið hefur orðið aukning í greiningu ungra barna á aldrinum 10 til 13 ára.
Tinna segir að það vanti fleira starfsfólk og það þurfi að auka fjárframlög ríkisins til BUGL og átröskunarteymisins. Meðferðin er flókin og þarfnast þéttrar þjónustu til að byrja með.
