Mannlíf birti þann 1.júní síðastliðinn grein með fyrirsögninni: „Þór myrti Braga í Vesturbænum – Vopnaður kjötexi, slaghamri og sveðju“.

Greinin var upprifjun á morðmáli frá árinu 2002 þar sem strætisvagnabílstjórinn Bragi Óskarsson var myrtur með ógnvænlegum hætti. Rannsókn lögreglu leiddi svo í ljós að ungur maður bæri ábyrgð á verknaðinum, en sá glímdi við fíkn og var í mikilli óreglu.

Morðingi Braga var dæmdur í 16 ára fangelsi. Hann hefur í dag afplánað sinn dóm, komið reglu á líf sitt og ekki komist aftur í köst við lögin. Hann kvartaði til Siðanefndar blaðamanna vegna umfjöllunar Mannlífs, en hann taldi ekkert tilefni fyrir fjölmiðil að rifja upp morðið og væri umfjöllunin meiðandi bæði fyrir hann sjálfan sem og fjölskyldu hans.

Mannlíf vísaði því á bug að greinin hefði brotið gegn siðareglum blaðamanna. Kæran til Siðanefndar byggi á því að ekki hafi mátt fjalla um málið en ekki á því að um efnislegar rangfærslur hafi verið að finna í greininni og hafnar Mannlíf því að hendur blaðamanna séu bundnar með þeim hætti.

Siðanefnd rakti að grein Mannlífs var liður í sagnfræðilegum greinaflokki sem nefnist Baksýnisspegillinn. Það væri ekki Siðanefndar að ákvarða hvort slíkt efni ætti erindi við almenning eða ekki, það væri mat blaðamannsins. Í kæru hafi ekki verið tiltekið hvaða einstök atriði greinarinnar hafi verið sett fram með ótilhlýðilegum hætti og brotið gegn siðareglum og því yrði að sýkna Mannlíf af kærunni.