Rafhlaupahjólaleigan Wind hefur hætt starfsemi sinni hér á landi. Nýlega mátti sjá fólk velta því fyrir sér hvort eitthvað væri að hjá rafhlaupahjólaleigunni því hjól frá þeim voru ekki að finnast á götum bæjarins. Einn rafhlaupahjólanotandi ákvað að senda fyrirspurn á Wind vegna þessa og svar þar sem fram kom að fyrirtækið væri hætt starfsemi hér á landi.
„Kæri viðskiptavinur, takk fyrir að hafa samband við þjónustuverið okkar og við biðjumst forláts. Við viljum láta þig vita að við höfum lokað fyrir þjónustu okkar á Íslandi, þess vegna er ekki lengur hægt að leigja rafhlaupahjólin okkar þar,“ segir meðal annars í tölvupóstinum frá Wind.
Þá kemur einnig fram að ekki séu neinar upplýsingar um það hvort Wind ætli að snúa aftur til landsins.
Það er þó ljóst að eitthvað hefur farið úrskeiðis í brottflutningnum frá Íslandi því ef smáforrit þeirra er skoðað má finna eitt einmana rafhlaupahjól sem varð eftir. Það virðist vera staðsett við Skeljagranda í Vesturbænum en batteríið er alveg að verða tómt. Hvað mun gerast þegar það klárast að fullu er ekki vitað.
