„Þetta er ekkert miðað við margt annað sem ég hef lent í, ég er ljóti kallinn hjá mörgum,“ segir ónefndur maður sem DV ræddi við í tengslum við atvik sem vakti nokkra athygli um síðustu helgi. Kona greindi frá því í íbúahópi á Facebook og í kjölfarið í viðtali við DV, að hún hefði stöðvað það sem virtist vera hjólaþjófnaður fyrir utan Ármannsheimilið í Laugardal.

Konan sá þá mann reiða reiðhjól frá íþróttahúsinu á meðan fimleikaæfing stóð yfir þar inni. Maðurinn kom á vespu og reiddi bæði vespuna og hjólið í burt. Að sögn konunnar virtist maðurinn auk þess ekki alsgáður. Hún stöðvaði því för hans og hafði samband við lögreglu. Er lögregla kom á vettvang hélt konan í burt og vissi ekki um málalyktir.

Í morgun fékkst staðfest frá lögreglu að ekki hefði verið lagt hald á reiðhjólið þar sem lögregla telur það vera í eigu mannsins. Það vildi einfaldlega svo til að hann hafði bæði vespu sína og reiðhjól til reiðar þennan dag. Maðurinn segir í samtali við DV að vespan hafi bilað en erfitt er að átta sig á því hvers vegna hann var á báðum farartækjunum.

Þrátt fyrir að hafa hvorki verið nafngreindur né vísað til einkenna hans á nokkurn hátt í frétt eða frásögn á samfélagsmiðlum þykir manninum gott að upplýst sé um málalyktir. Ljóst er að konan var í góðri trú en mat aðstæður ekki rétt miðað við niðurstöðu í málinu. Maðurinn segir að hún hafi virst mjög hrædd og hann sé ekki óvanur slíkum viðbrögðum fólks og virðist það mega ráða af yfirbragði hans.

Hjólaþjófnaðir virðast hafa færst mikið í vöxt undanfarin ár og valda tjóni og sárindum. Þekkt er ötult starf Bjartmars Leóssonar að því að endurheimta stolin reiðhjól og skyldar eigur. Honum hefur þó einstaka sinnum orðið á í messunni og ljóst er að úr vöndu er að ráða þegar aðstæður eru metnar þar sem þjófnaður virðist eiga sér stað.