Á kvöld- og næturvakt lögreglunnar á höfuðborgarsvæðinu bar það helst til tíðinda að tilkynnt var um mann sem fór með rafmagnshlaupahjól inn í hús og lék grunur á að hjólinu hefði verið stolið. Lögreglan rannsakaði málið og lagði hald á hlaupahjólið þar sem grunur leikur á að því hafi verið stolið. Meintur þjófur er þekktur hjá lögreglunni vegna fyrri afbrota.

Tilkynnt var um þjófnað á hlaupahjóli úr fjölbýlishúsi i vesturhluta borgarinnar og er málið í rannsókn.

Maður var sleginn fyrir utan öldurhús í miðborginni og var hann fluttur með sjúkrabifreið á bráðamóttöku. Ekki liggja fyrir upplýsingar um ástand hans.

Tilkynnt var um bílveltu í nótt í austurhluta borgarinnar. Tveir voru í bílnum. Frekari upplýsingar liggja ekki fyrir að svo stöddu.

Einn ökumaður var handtekinn grunaður um að vera undir áhrifum áfengis og fíkniefna.

Tilkynnt var um innbrot á heimili og er málið í rannsókn.