Fjölskyldu og tónlistarhátíðin Kótelettan verður haldin á Selfossi í 11. skipti nú í sumar. Hátíðin átti að fara fram dagana 11.-13. júní næstkomandi en í ljósi gildandi sóttvarnalaga mun ekki vera hægt að halda hátíðina á tilsettum tíma. Þess í stað hefur verið ákveðið að færa hana aftur um mánuð þ.s. fram til 9.-11. júlí, þegar öllum takmörkunum innanlands hefur verið aflétt eins og varfærin áætlun stjórnvalda hefur kveðið á um.
Mikil eftirvænting er hjá hátíðarhöldurnum og er undirbúningur hátíðarinnar vel á veg komin. „Að venju verður öllu til tjaldað enda finnum við fyrir mikilli eftirvæntingu í samfélaginu,“ segir Einar Björnsson, framkvæmdarstjóri hátíðarinnar.
Miðasala á tónlistarhátíðina mun hefjast nú í byrjun júní inn á www.kotelettan.is þar sem einnig verður hægt að nálgast nánari upplýsingar og dagskrá hátíðarinnar í ár.
