Um klukkan 22 í gærkvöldi datt maður af rafskútu. Hann reyndist vera talsvert ölvaður en var nánast ekkert slasaður og vildi ekki þiggja aðstoð lögreglu. Skömmu fyrir klukkan 23 óskuðu sjúkraflutningamenn eftir aðstoð lögreglu því ölvaður maður hafði veist að þeim. Hann var orðinn rólegur þegar lögreglan kom á vettvang og þurfti hún því ekki að grípa til aðgerða.

Á níunda tímanum lentu bifreið og bifhjól í árekstri. Bifhjólamaður ætlaði sjálfur að leita á Bráðadeild en meiðsli hans voru minniháttar. Á níunda tímanum í gærkvöldi varð minniháttar vespuslys í austurborginni.  Foreldrar ökumannsins, ungmennis, ætluðu að sjá um að gera viðeigandi ráðstafanir vegna þess.

Tilkynnt var um tvö innbrot í höfuðborginni síðdegis í gær. Annað í austurbænum og hitt í vesturbænum. Bæði eru í rannsókn. Einnig var tilkynnt um innbrot í fyrirtæki á þriðja tímanum í nótt og er málið í rannsókn.

Þrír ökumenn voru handteknir í gærkvöldi og nótt grunaðir um að vera undir áhrifum fíkniefna.